Amerika e tsetela limilone tse robeli le halofo moruong oa Mafeteng

download

’Muso oa Amerika le oa Lesotho, e tekenetse tumellano ea tebelisano moo Amerika e tla tsetela limilone tse fetang tse robeli tsa Maloti khahong ea setsi sa phehlo ea motlakase ka letsatsi, Mafeteng, Ha Ramarothole ho tloha ka Pherekhong isao.

Moemeli oa Amerika Lesotho, Her Excellency Rebecca Gonsales o re qetellong ea ts’ebetso ena, Lesotho le tla be le ekelelitsoe ka mega-watt tse mashome a mabeli motlakaseng oa Lesotho kaofela, ha tlhoko ea naha e le tse lekholo le mashome a ts’eletseng.

Morero ona o ile oa emeroa ke moithaopi oa LeAmerika ea neng a sebetsa le mokhatlo oa temo oa RSDA, Monghali Matt Orosz ea seng a thehile k’hampahi e bitsoang OnePower, e leng eona e tlang ho tataisa khaho ea setsi se tlang ho hira Basotho ba ka bang makholo a mabeli, ba litsebo tse fapakaneng, nakong ea khaho, le ba ka bang 24 ha se se sebetsa.

Tšebetsong ea sona, setsi Ha Ramarothole sa phehlo ea Motlakase ka letsatsi, e ba sa boraro kamor’a sa Mantsonyane le sa ’Muella e leng tse o fehlang ka metsi a linoka tsa Mantšonyane le Metsi a Lihlaba tsa Lesotho ka tatellano.

Monghali Orosz o re ha ba e-s’o fihlele qeto ea hore na thepa ea motlakase e tla rekoa kae, empa, ba tla reka ea boleng bo holimo, e tlang ho tšoarella nako e telele.

Bohlokoa ba motlakase oa Ha Ramarothole, khahlanong le oa metsi, ke hore oona o tla fumaneha ka linako tsohle, ha oa metsi a linoka tse boletsoeng o laoloa ke mothamo oa noka ka ’ngoe.