Sesole le sepolesa se ts’oelisa masholu liphoofolo tsa bosholu Qacha’s Nek

Sesole sa Lesotho se hlommeng motebo-ntloana Sehalaba-thebe Thamathu Qachaseneke, se tšoelisitse masholu likhomo tse kaholimo ho leshome le lipere tse peli mafelong a beke e fetileng se thetsane ka mahetla le Sepolesa sa Lesotho.

Ofisiri ea liphatlalatso ea Sesole sa Lesotho Capt. Sakeng Lekola, e re masholu a ile a li nyahlatsa ha a hlokomela hore a se a behiloe ngoabela, ’me liphoofolo tseo ho fumanehile hore ke tsa moahi oa Ha-Majara Lerotholi.

O re sechaba sa Libeleteng le sona se ile sa hlaba mokhosi oa ho utsuoa ha linku tse kaholimo ho mashome a supileng tsa Ha-Napo Matela, tseo le tsona masholu a ileng a li tšoelisoa.