Mapotoana a re ha a kene taba ea basali ba loanneng Setsoto

Motlatsi oa phala ea Potoana o re Mapotoana ha a kene ntoa ee ho thoeng e etsahetse Setsoto, papaling ea Matlama le Linare, lipakeng tsa Lepelabasali le Letona la Lipapali, ha eba ba e kena, ba ne ba tla ema ka lehlakoreng la Lepelabasali.

Monghali Ramosa Ramaisa o buile tsena Probonong ea Labobeli lena, a arabella lekhotla la habo moo motsamaisi oa lenaneo a neng a re batho ba ipitsang Mapotoana ba mo buela lipolelo tse bohloko ha a re ha a tsebe letho ka ho qitiletsana ha basali bano, h’a bona, e bile h’a utloa.

O ile a tšehetsoa ke banna le basali ba itlhalositseng e le mapotoana le manonyana ba ileng ba re motho ea ka utloang bohloko ha Leholosiane le koboloa ke LeKobotata, ha se LePotoana la ’nete, hobane Mapotoana a ntse a e-s’o fole meupa ea thupa ea Maholosiane a neng a lihe ’muso oa oona, a bitsoa litalane, a re oona a ilo tsuba ’momo oa ’misisi.

Ba re ka nako ’ngoe ba tlohe ba re ba baleha majoe a mutsu kahar’a Potoana ba ea lisofeng tse mabotho-botho tsa Kobotata.