Mosali o balehela ha habo, o siea monna le mohlankana ba batana ka melami, ba mo tseka

Mosali o ile a balehela ha habo Maluba-lube, Mokhotlong, ha monna oa hae le mohlankana oa motseng oo oa Ha-Retšelisitsoe Morojele, hona seterekeng seo, ba batana ka melami, ba mo tsekisana, ha ba ne ba tsoa moketeng oa letsema la e mong oa baahi ba motse oo bosiung ba Labosupa le fetileng.

Monghali Kopanang Kobile, o re bosiung boo, monna e mong o ile a tloha moketeng oa letsema, a siea monna oa lelapa sebakeng seo, a ea ha hae, eare mong’a ntlo le eena a orohela hae, a se ke a buleloa ke oa hae oa litjepa, ho fihlela a itšohlometsa ka tlung, a ba fumana ba le babeli.

O re ho ile ha kupa e mahlo-mafubelu lipakeng tsa banna bao, ba ntšana likotsi tse mpe, mosali ha a bona sena, a hla a hlekeha sebakeng seo, eaba ke ho nyamela ha hae, ’me mong’a lelapa o maemong a hlobaetsang a bophelo, hape o ne a ile a akheha, bosiung boo. Leha ho le joalo, monna o ile a potlakisetsoa sepetlele ho latela boemo ba hae.