Monna o tšoara leqhekoana ka pelaello ea boloi, Thaba-Tseka

Moahi oa Phomolong Live-Stock, Ha-Mofutisi,Thaba-Tseka, o re o qeteletse a lokolotse mosali-moholo ee a mo belaellang boloing, kamor’a hore morena le morali oa ’melaelloa ba fihle ba bolela hore o na le bothata ba hlooho, ha sepolesa sona se ne se mo laetse ho mo isa ho sona kaha a mo fumane a ntse a tsamaea ka har’a jarete ho bonahala a phathahane ka see a neng a ntse a se etsa.

Monghali Masilo Leaooa o re sena se latela hore ha a ntse a tsamaea ka jareteng eo ea hae, a fumane hukung ea ntlo ho na le mantle a seng a le moo, ha ’motsisisa lebaka le mo behang sebakeng, eo a kopa ts’oarelo, a sa bolela se ’mehang moo.

O re nkhono ke motho oa Ha-Noko, o mpa a le motseng oo hobane a lula ha e mong oa bana ba hae, ea sa buang hantle le eena a re hoja o bolaile ’ma’e a tle a tsebe ho mo pata,’me lena ke lekhetlo la bobeli a belaelloa boloi, hape ho utloahala ha habo a ntse a tlositsoe ke boemo boo.