Monna ea lulang mahaeng o tla haheloa ntlo ke ofisi ea lepelabasali, Qachaseneke

Monna oa Lebakeng Ntšupe Ha-Thabo, Qachaseneke, ea ntseng a lula Ha-Rakatibana, hona seterekeng seo, ea cheletsoeng ke matlo a mararo le ho utsoetsoa liphoofolo, o tla haheloa ntlo ea bolulo ke ofisi ea Lepe-la-basali ba Lesotho, Tsoelike Ha-Matlali, ’me lekote la eona le tla phetholoa mafelong a beke ena.

Monghali Lehlohonolo Tsekela, o re ka mor’a ho chelloa ke matlo, o se a lula mahaheng, ’me o bile a fumana tšepiso ea hore o tla haheloa motlotloane sebakeng se secha sa Ha-Matlali, ’me o ntse a lebeletse ka tšepo hore taba eo e tla fela e phethahale.

Dr. ’Maesaaea Thabane ka ofisi ea habo, o re litaba tsa monghali Tsekela, o li tsebisitsoe, eaba o etsa qeto ea hore a pholose bophelo ba hae ka hore a tle a mo hahele moo a ka patang hlooho teng.