Banna ba motse ba fumana likhomo tsa e mong kamor’a ho tsoa lets’olo

Banna ba motse oa Setibing Ha-Lirahalibonoe, Maseru, ba fumane likhomo tse leshome tsa moahi oa motse oo, Thabeng ea Bitso-lebe kaholim’a Ha Lebese, Berea, tse neng li utsoitsoe mesong ea Laboraro la beke ena, motebong o Setibing Ha-Leu.

Sena se latela hore ba tsoe letšolo la ho li batla,’me eka li fumanoe li alositsoe ke moshanyana eo e itseng ha a bona banna ba bang ba neng ba le patlong ea tsona ba hlahella, a ileng a khola phalo,’me ba qeteletse ba sa mo fumana.

Ea buileng lebitsong la bona monghali Matsie Moramang, o re mashotsoana a mabeli, a ne a ile a fihla motebong oo, a boholoa ke lintja tsee a sa kang a li natsa, molisana ha a hlaha, a se ke a mo tsotella, a khanna likhomo.

Ho sa le joalo, Moramang o boletse hore kaha ba sa le hole le hae, ba tla batla botšabeli metseng e haufi le moo ba leng ho na teng.