Setopo se fumanoa se le leqeba la sethunya tlhafunelong, Qachas’Nek

Monna oa Tebellong Ha-Mapoote, Qachaseneke, o re setopo sa monna se nang le leqeba la sethunya tlhafunelong, se ileng sa tlalehoa se fumanoe ka mor’a motse oa Makhalong seterekeng seo ka Moqebelo o fetileng, ke sa ngoana oa moholoane oa hae.

Monghali Thabang Kanono, o re pelaelo ea lelapa ke hore monna o ne a ilo ithekisetsa matekoane ho la Afrika-Boroa, eare ha a le tseleng e khutlelang hae, a tšoaroa poho, hoba o fumanoe a se na chelete le tsee a neng a li rekile.

O re lelapa le tsebile ka ho timela ha setho sa lona ka e mong oa baamani le lona, ea ileng a botsa hore setho seo ha se e-so fihli hae na, hoba le mohala oa sona oa letsoho o ne o se sa fumanehe.

O re lelapa le ile la etsa liphuputso tsa lona, tsa fumana setopo sa mor’a oa lona polokelong ea bafu. Litaba tsa mofu eo, li ne li ile tsa hlahella litabeng tsa Moafrika e le ha ho hlajoa mokhosi, ha ba ha e-ba le motho ee ho ileng ha utloahala hore malome oa hae o mo tsebile, athe ha se eena, ke osele.