Setloholo se belaelloa polaong le ho hlahisa likotsi baholo ba hae, Butha-Buthe

Mok’hanselara oa Makhoakhoeng Ha-Chaba, Botha-Bothe o re mohlankana oa motse oo, o belaelloa polaong ea nkhono se-tsoala ’ma’e, ha batsoali ba ntat’ae, a ile a ba hlahisa likotsi, ’me e mong o kene sepetlele, ka Moqebelo o fetileng.

Monghali Thabang Nkhahle, o re mohlankana eo o ile a tšoaroa ke sechaba ka mor’a ho hlabeloa mokhosi, e le ha a ne a qeta ho bolaea nkhono se-tsoala ’m’ae, joale a se a ntse a loantša batsoali ba ntat’ae.

O re mohlankana ha a botsisisoa mabaka a liketso tseo tsa hae, o ile a re mofu le mahlatsipa a mo qetela lijo, le hoja ho sa utloisisehe hore ha a lula ha habo ’m’ae, ba habo ntat’a ba ameha joang litabeng tsa lijo. Monna o litlamong tsa sepolesa sa Botha-Bothe.