Lepe-la-basali-ba-Lesotho le etela lehae la batho ba nang le bokooa, Maseru

Ofisi ea Lepe-la-basali-ba-Lesotho, e re Dr. ’Maesaea Thabane o tla etela lehae la batho ba nang le bokooa la St. Angela le Ha-Seleso, Maseru, ka hora ea leshome hoseng ha Laboraro la beke ena, ka sepheo sa ho ea bona tlokotsi eo ba phelang ho eona ea letsatsi ka leng.

Phala ofising ena, monghali Taunyane Silas Monyatsi e re ho fumanehile hore lehae leo le na le litlhoko tse kenyeletsang metsi, hoba a ile a koaloa ka baka la mokoloto oa lona o phahameng.

Monghali Monyatsi, o re lehaeng lena, ho lula batho ba nang le bokooa ba mashome a mararo a metso e ’meli, bao ba mashome a mabeli a bona, ba tsamaeang ka lituloana tse mabili.

O re bothata bo boholo sebakeng seo, ke tlala le serame, hobane litofo tse teng tsa patsi le mashala, ha li na tsona libeso, athe motlakase o fokolang, ba o reka ha ba rekisitse mahe a likhoho tse lekholo le mashome a robong a metso e robeli.