Banna ba bahlano litlamong tsa sepolesa sa Maputsoe

Banna ba bahlano ba litlamong tsa sepolesa sa Maputsoe, ka pelaello ea bosholu ba lihloohoana tsa lipompo tsa metsi tsa tikolohong eo, tsee baahi ba neng ba hlola ba fumana mabala a bona a tletse metsi ka baka la ho chomoloa ha tsona.

Mofuputsi oa litaba ebile e le moahi tikolohong eo, monghali Sepeka Makoae, o re ho ne ho ile ha utloahala monyenyetsi o ileng oa lebisa ho fumanoeng ha moetsi oa liketso tseo, ea ileng a hlahisa ba sebetsang le eena.

O re ka mor’a hore mahokela a qhautse ’melaelloa, sechaba se neng se halefisitsoe ke bosholu boo, se ile sa batla ho qeto ka eena, empa sepolesa sa fihla sa mo pholosa, sa ba sa itatela ba bane bao a neng a se a ba thontse ka mabitso.

Ho nyamela ha lihloohoana tsa lipompo tsa metsi sebakeng sa Maputsoe, ho ne ho ile ha tlaleheloa Lehakoe la Litaba hore mosebetsi oa tsona, ke ho rekisetsoa ma-Nigeria ka makholo a aehlano a Maloti, hore a e’o etsa masala a menoaneng.