Moahi oa Sehlabeng sa Thuathe Ha Koali, Berea, o re morali oa hae o haba selemo sa bobeli a robehile serope kotsing ea koloi e bileng mafelo a khoeli ea Pherekhong, ngoahola, ka Lesotho ka mona, empa o ntse a sokolisoa ke sepetlele ha a lokela ho tlatsetsoa buka ea matšeliso.

’Mamathule Kabi, o re morali kamor’a kotsi o ile a potlakisetsoa sepetleleng sa ’Mamohato, moo a alafuoeng,’me ngaka ea bolela hore buka e tla tlatsoa ha mokuli a se a sa ee tlhatlhobong.

’Mamathule o re ke moo ha morali a se a tsoile sepetlele, a ileng a lla ka bohloko boo a bo utloang seropeng, a boela ngakeng moo a ileng a bolelloa ho tla loka hamorao, empa ha se ke ha eba joalo.

O re morali o qeteletse a chakela ’mangoana’e RSA, khoeling e fetileng, ea ileng a mo isa sepetlele hobane a ne a ntse a lla ka bohloko, a sebetsoa bocha kaha a boleletsoe hore tšebetso ea sethathong e fosahetse, ‘me o ntse tsamaea ho na teng le joale, le maoto a lekana kaha a ne a sa lekane pele a ea RSA.

O re tšabo ea hae ke hore nako ea ho sebetsoa ha taba ena ea matšeliso, e haba ho fela.Phala ea sepetlele Mothepane Thahane e re ‘Mamathule a ee ka Lapele la beke e tlang.