Thabo Ramatla o lokolotsoe litlamong empa litaba ha lia fela

Khang ea akhente, ea Mohoebi oa Mafeteng, e bile e le moparamente oa Sethala sa Moruo (MEC), ea qosoang ka tlolo ea molao, e tla mameloa libekeng tse peli tse tlang, moo akhente e tsekang hore ho botsoa ha hae lipotso ke mafokisi, bosieong ba ’muelli oa hae, ho phatlalatsoe ho ne ho se molaong, ’me ho se na matla a letho, ke Lekhotla le Phahameng la Lesotho.

Tsena li latela ho ts’oaroa joalo ka nku e isoang tlhabong ha Monghali Ramatla, MP, ke mafokisi a ntlokholo ea sepolesa sa Lesotho, Maseru, ka La-pele la beke ena, a faselelitsoe ka sekotlolong sa koloi e neng e khannoa hampe, ho tloha Mafeteng ho tla kena Maseru, moo a fihlileng a akheloa ntloana-ts’oana, a opeloa, a lumaela bosiu bohle, a bile a hatsetse.

Mosali oa hae, ’Makhotso Ramatla, o hlalosoa a ile a tlola matjato a masesanyane, ha a utloa tsa ts’oaro eo e se nang botho ea molekane oa hae, a kopa thuso ho Adv Zwelakhe Mda, KC, ea ileng a hlahlela nyeoe e potlakileng ea Habeas Corpus, bosiung ba Labobeli kapel’a Polo Banyane AJ. Mafokisi a mo lokolla litlamong le pele a ka fumana taelo ea lekhotla.

Likopo tsa ’muelli oa hae, e ne e le hore a hlahisoe ka pel’a lekhotla hang-hang, lona le mo lokolle, a se ke a hlokofatsoa, a lumelloe ho bona ngaka ea boikhethelo ba hae, ho botsoa lipotso ke mafokisi bosieong ba ’muelli oa hae ho phatlalatsoe ho bile ka thoko ho molao, ho bile ho sena matla a letho, ’me mofapa-hlooho o lefe lits’enyehelo tsa nyeoe eo.

Adv Mda, KC o re erekaha a se a lokolotsoe, ho saletse lintlha tse peli, e leng ea lits’enyehelo tsa nyeoe le ea hore, ho botsoa lipotso ha ’melaelloa eo, bosieoeng ba ’muelli oa hae, ho phatlalatsoe ho bile ka thoko ho molao, ka lebaka leo, e bile ntho ea mafelafelane.