Litlaleho tsa lipolao tsa batho seterekeng sa Botha-Bothe le Leribe

Mok’hanselara oa Setlakalleng Ha-Qhobela, Botha-Bothe, o tlalehoa a ile a shoa, ka mor’a ho hlajoa ka ntho e bohale ke moamani le eena, bosiung ba Labobeli la beke e fetileng, sesosa sa lefu ha se e-so tsejoe.

Mongoli oa morena oa Setlakalleng, ’Mamoshoba Makhoabenyane, o re ’melaelloa ketsahalong eo, o bile a inehela sepoleseng sa ’Muela, moo ho sa tsebahaleng hore o qeteletse a hlahile khotla kapa che.

Ho sa le joalo, monna oa Ha-Belo, Botha-Bothe, o litlamong tsa sepolesa sa setereke seo ka pelaello ea polao ea mosali oa Mabothile, Ha-Shepeseli, Leribe, shoalaneng ea Laboraro la beke ena.

Moparamente oa Matlakeng No. 11, ’Maletsema Lenkoane Letsoepa, o re mosali o ne a e-tsoa mosebetsing, a fapohela semousung sa motse ho reka litlhoko tsa hae, empa tseleng, a qhautsoa ke monna ea ileng a mo hulela ka morung.

O re mosali o ile a hoelehetsa,’me ba ileng ba phalla, ba fumana e se e le maobane, le ha ho le joalo ba boneng ’melaelloa ha a menola tlhabela, ba hlabela ba motse o haufi mokhosi, bao, ba atleha ho mo tšoara.