Lekhotla le phahameng le lokolla phofu ea mapolesa a Mafeteng

Monghali Mahoete Mabuse o ile a lokolloa litlamong ke lekhotla le phahameng la Lesotho, kamor’a ho fumana hore mapolesa a ne a mo emelletse ka lipaputla, a mo tokhotsa hoja lona le ne le laetse mapolesa hore a se ke a hatikela litokelo tsa hae tsa botho.

Mabuse oa Mafeteng Ha Raliemere, o ne a ile a nehelanoa mapoleseng a Mafeteng ke akhente ea hae, Adv Zwelakhe Mda KC, ka La-pele la beke ena, kamor’a hore Mokhesi AJ a fane ka taelo ea hore mapolesa a neng a ntse a mo batla, a se ke a mo etsa lintho tse bohloko, ha a se a le ho ’ona.

Ka le hlahlamang, ha ’ma’e a ilo mo hloela, o fumane mahlo a hae a le makhubelu, mathe a fapakane le mamina, a re ha a bo hlotha, mapolesa a ne a mo fetotse ntetekeng bosiu bohle, khahlanong le taelo ea lekhotla le phahameng.

Mokhesi AJ o fumane mapolesa a nyelisitse taelo ea hae, ka lebaka leo, ea ba o se a bile a hana le kopo ea ’ona ea hore monna eo a bolokoe chankaneng ha a ntse a emetse nyeoe ea hae.