Moahi oa Ha-Tsolo, Maseru, o re tšenyo ee ba e etsatsoang ke masholu, masimong a poone a Linakotseng, ke e otlang pelo, hoba ba fumane hore a phuntsoe moo ho neng ho keke ha bonahala hore ho ntse ho senngoa.

Monghali Tšepo Kolobe, o bua sena ka mor’a ho qhautsa monna ea neng a e-tsoa masimong ka shoalane ea Labobeli lena, a nkile mokotlana oo itseng ha a ’motsa ka se ka hare, eo a meneka ha a lokela ho hlalosa.

O re ha a se botsisisa monna eo ka thata, ke ha a bolela hore o fela a khile poone eo masimong ao, ’me ha e le moo a se a tšoeroe, o itlama ho lefa ka khomo, ee itseng ha se ea hae, ke ea nkhono oa hae.

Le ha ho le joalo, monghali Kolobe, o re o ile a qetella a isitse monna eo sepoleseng sa Ha-Thetsane, ’me o tla hlaha khotla ka Labohlano lena. Litaba tsena tsa bosholu ba poone masimong a Linakotseng, li tiisitsoe ke monghali Tšosane Mosoeu oa Ha-Tsolo, moo.