Metsofe le bakuli ba letela litšebeletso Semonkong le Butha-Buthe

Tlaleho e hlahang Semonkong e supa hore Maqheku le Maqhekoana a amohellang litsiane tsa oona posong ea moo, ha esale a li letela ho tloha hoseng ho fihlela letsatsi le e-ea matubatsana, ka Lapele la beke ena.

Mofuputsi oa Litaba oa Moafrika sebakeng seo Ts’eliso Sehloho o re ha esale bo- nkhono le bo-ntate Moholo ba ora letsatsi moo, ba lebeletse litsiane tsa bona, ’me ba boleletsoe ke molebeli hore ba boele ka Labobeli lena, ha ba bang ba tla khutlela ka Lapele le tlang.

Lehakoe la litaba la Moafrika le ikopantse le lefapha le ikarabelang, lona la re ho na le tiehiso e joalo,‘me Lekala le ntse le lokisetsa ho tla fana ka phatlalatso malebana le seo

Ho sa le joalo bakuli ba neng ba ile kokelong sepetleleng sa Butha-Buthe, ka Lapele lena, ba re ba bonoe ke lingaka kamor’a ho kopana le mookameli, e le ha ba hlokomela hore esale ba kokomala moo ho tloha hoseng, feela ho sebelelitsoe batho ba palo e fokolang.

E mong oa bona o re ha ba bona letsatsi le haba ho likela ho se thuso ee ba e fumanang, ba ile ba phothoma mookameli, ‘me ke moo ba ileng ba bona lingaka li kena ofisi le ofisi ho ba thusa.