Mosali o re o belaela hore barali ba hae ba babeli ba hlasetsoe ke meea e litšila

’Matlhokomelo Makepe oa Kubake, Ha-Molahlehi Mohale, Mohalesuku, ea lulang Borokhoaneng, Maseru, o re ho fihla moo a tennoeng ke bokulo ba barali ba hae babeli bo ba hlaselang nakong ea Mariha feela, ’me o belaela e le ba meea e litšila.

O re bokulo bo simolotseng ka mongoaha oa 2015, ho fihlella joale bo mo sotlile haholo hoba, ha a ba ngoathela lijo, ba atisa ho ’molella hore o ba noketse letsoai le lengata, ho feta moo, a ngoathele ntho e haufi le bona, feela ee eena a sa e boneng.

O re o entse qeto ea ho ea ho Sandawana hobane e mong oa barali ba hae a fihlile ho eena a re o tšoeroe ke hlooho ebile ho na le linale tse mo hlabang, eaba eena o mo joetsa hore o leba ho Sandawana ho ea batla thuso, eo a re a se ee, oa mo tšaba.

O re o li mathile lingaka tsa Sesotho, o khathetse, hoba e ne re ha a fihla le methokho ea tsona, hae, eba e-ea mo nyamella, ’me o batla se ka kokobetsang morali eo oa hae, hobane ha a bua le eena, oa mo hlasela.