Khaello ea chelete litsing tsa khaso tsa Lesotho e li setisa ho hola

Mohlomphehi Mohlophisi e Moholo o re bofutsana ba litsi tsa Lesotho tsa khaso le phatlalatso ke eona e li fetolang makhabunyane a bapolotiki le barui ba naha ena, ka mabaka a bobolu bo kopanetsoeng ke bahlanka ba ’muso le bahiri bao.

O bua tsena e le ha a fana ka maikutlo holim’a bohlokoa ba letsatsi la boraro khoeling ea Motšehaneng le ketekoang ke linaha tsohle, kamor’a ho phatlalatsoa joalo ke Mokhatlo oa Machaba a Kopaneng.

Morena Sebonomoea o re kamor’a ho phatlalatsoa ha letsatsi leo, Unesco e ne e hlophise seboka sa machaba Windhoek, Namibia, se neng se phatlalatse tokomane ea bohlokoa e bitsoang Windhoek Declaration, e neng e tlame mebuso ho nolofatsa mecha e ka etsang hore likoranta li lokolohe, li ngatafale, li be li ikemele.

O re lilemong tse leshome tse latelang, ho ile ha boela ha kopanoa hona Windhoek, moo ho neng ho hapelloe litsi tsa khaso tokomaneng ea pele. Ea bobeli ea tsoa e se e bitsoa Windhoek Declaration Plus Ten, e neng e thuse MOAFRIKA FM le liealemoea tsohle tsa Lesotho ho hokeloa litoreng tsa LNBS.

Empa, o re boikemelo bo boima ha litsi tsa khaso li sena chelete ka lebaka la ho hana ka eona ha likhoebo tse kholo, tsee tse ling tsa eona li bonoang li e hafatsaka ka Afrika Boroa. O re mohlala ke oa Koporasi ea Mehala e fang Kaizer Chiefs le Orlando Pirates Bilone ea Maloti, moo sehlopha ka seng se nkang limilone tse makholo a mahlano.

Ka mokhoa o joalo, o re lireteli tsa biri tsa Afrika Boroa, tsee biri ea tsona e nooang le Lesotho mona, ’moho le barekisi ba Toyota  li ts’ehetsa lipapali tsa naha eo ka senyethehali sa maloti empa ka Lesotho ka mona li hana ka mokotla, ka mabaka a sa tsejoeng.

Lekholokoe le re ka mokhoa o kang oo oa lipapali hantle, litsi tsa khaso le phatlalatso li hloka chelete e ngata, e tsoang hona likhoebong tseo, ka mokhoa oa lipapatso hore li fihlele ntlafalo le kholo e li lokelang.