DPP e hlotse likhetho tse akaretsang tsa Malawi

Monghali Arthur Peter Mutharika oa mokha oa Democratic Peopoles Party (DPP) naheng ea Malawi o hlotse likhetho tsa naha eo, ’me o phatlalalitsoe e le eena president e emetseng ho hlapantsoa kamor’a likhetho tse neng li tsekoa ka matla.

Morena Ramokhali Shale o tlaleha a le Malawi moo hore DPP e tsoile ka lesobana la nale, ka ha e fumane linoko tse 38.5, khahlanong le 35.1 tsa Malawi Congress Party (MCP). Letsatsi la tlhomamiso ea president e ncha ha le e-s’o phatlalatsoe.

Morena Ramokhali o re phatlalatso ena e latela hore lekhotla le phahameng la naha eo, le lumelle komisi ea likhetho ho tsoelapele ka phatlalatso ea mohloli, tlholisanong ea bopresidente, empa la boela la laela hore nyeoe ea Lazarus Chambers oa MCP, e kopang tlhahlobo ea boahloli ba sephetho sa likhetho mabatooeng a leshome e tle e tsoelepele ha morao.

Monna o shoa kamor’a ho khakhathoa ke sechaba, se ‘melaella bosholung ba likhomo, Leribe

Monna oa Ha-Ralikuku, Leribe, ea neng a belaelloa bosholung ba likhomo tse ’ne tsa motse oo ke baahi ba oona, o tlalehoa a ile a  khakhathoa ke bona ho fihlella a timela, ka mor’a ho lokolloa  sepoleseng sa Maputsoe ka Labone le fetileng.

Mofuputsi oa litaba tsena monghali Sepeka Makoae, o re monna o ne a ile a belaelloa bosholung ba likhomo,’me baahi ba mo qhobela Ficksburg moo neng a itse li hona teng, empa tseleng, mapolesa a ile a mo hloibila matsohong a bona, a ea ka eena ka Labobeli le fetileng.

O re ka Labone la beke eo, monna o ile a lokolloa ke sepolesa, ha a fihla motseng oa habo, baahi ba mo qhautsa hoja a ne a se a le mothating oa ho hlaba ka thipa, ngoan’abo likhomo tsela tsa bosholu, ba mo khakhatha ho fihlela a timela, ha tšoaroa ngoan’a bo litjepa.

Ho sa le joalo, monghali Sepeka o re monna o ile a potlakisetsoa sepetlele Hlotse ke sepolesa sa Maputsoe, ka mor’a ho mo fumana a le maqeba a ho hlajoa ka ntho e bohale ke batho ba sa tsejoeng, haufi le lifeme tsa Ha-Maqele, Leribe, ka Moqebelo o fetileng.

Monna ea lulang mahaheng Ha Ratibana o tla haheloa ntlo ke Lepe-la-basali

Monna oa Lebakeng Ntšupe Ha-Thabo, Qachaseneke, ea ntseng a lula mahaheng a Ha-Rakatibana, hona seterekeng seo, ka baka la ho chelloa ke matlo ngoahola le ngoahola-kola, o re o leboha ofisi ea Lepelabasali ba Lesotho e tlang ho mo hahela ntlo ea bolulo Tsoelike Ha-Matlali.

Monghali Lehlohonolo Tsekela, o re tšepo ea hae litabeng tsena, e tiisitsoe ke ho bona thepa ea khaho e ntseng e fihla sebakeng seo ntlo e ilo ba ho sona,’me mosebetsi oo, o tla etsoa ke litho tsa Sesole sa Lesotho. Ho phetholoa ha lekote la khaho eo, ho bile ka Moqebelo o fetileng.

DPP e hlotse likhetho tse akaretsang tsa Malawi

Monghali Mutharika oa mokha oa DPP naheng ea Malawi o hlotse likhetho tsa naha eo, ’me o phatlalalitsoe e le eena president e emetseng ho hlapantsoa ea naha eo.

Morena Ramokhali Shale o tlaleha a le Malawi moo hore DPP e tsoileng ka lesobana la nale, ka ha e fumane linoko tse 38.5, khahlanong le 35.1 ea Malawi Congress Party. Letsatsi la tlhomamiso ea president e ncha ha le e-so phatlalatsoe.

E chaile ka lehlakoreng la komisi e tsamaisitseng likhetho tse fetileng

Komisi ea likhetho ea Lesotho, e bopiloeng ka benghali Mahapela Lehohla, ’Mamosebi Pholo le Makase Nyaphisi e feletsoe ke nako, ’me lekhotla la naha le se le elelitse Motlotlehi hore a lokolle baetellipele ba mekha ea lipolotiki, ba thonye mabitso a ka koalang sekheo se bakiloeng ke ho felloa ke nako ha komisi eo. Ho rialo phatlalatso ea ’muso oa Lesotho ea La-pele la beke ena.

Phatlalatso ea ’muso e re mabitso bakeng sa komisi eo ea bohlano, a tla thonngoa ho ea ka lipehelo tsee boetellipele ba mekha ea lipolotiki tsa Lesotho bo tla e lumellana.

Komisi e lokelang ho hata kosene, e tsamae, e hlalosoa e ne e ile ea hlahlela nyeoe ka lekhotleng le phahameng, le ileng la hana ho e ahlolela, likopong tsohle tsa eona. 

Lenaneo la Re Nyebekolla Taba, le bileng maobane, le tsoetse bamameli ba lona molemo oa ho tseba matšoao, tsela ea ho ja le ho noa, hammoho le ho itlhokomela, ha motho ha a ena le bokulo ba sebete.

Bamameli ba re motho o tla bona ka mosese, mahlo le matsoho tse bang tšehla, le ka botsikinyane ’meleng, ’me khothaletso ea bona e bile hore motho ha a a bona a potlakele ngakeng, feela a sa khaotse ho noa metsi a mangata.

E mong oa bamameli o re ha a se a itlhokometse ka a mang a matšoao ana, o ile a ea ngakeng e ileng ea mo behela hore na a khutlile neng, empa ka lebaka la ho noa metsi a mangata, ea ba ke ho iphekola ha hae, ’me o ile a netefaletsoa ke ngaka hore ha e sa bona letho.

Ngoanana oa Thoteng Ha-Joang Molapo, Mokhotlong, ea lulang Ha-Mabote, Berea, o re o kopane le mok’hanselara le mokhethoa ba moo a phelang teng ka litaba tsa mor’a hae ea nang le lefu la sebete, ho bonahala bo tla mo tsoela molemo.

’Malehloa Holomo, o re o bile ho mok’hanselara ea ileng a mo fetisetsa ofising ea mokhethoa, e ileng ea ’molella hore e tla pholatsa mokhoa oa hore lesea le likhoeli li tharo le tle le fumane pasa ’moho le eena, molemong oa hore le e’o sebetsoa lefu leo Bloemfontein, Afika Boroa.

O re lesea la hae le seng le le likhoeli li tharo, le hlahile le sentse le e-na le lefu lena le hlokomelehileng ka mahlo le ka mosese tse ’mala o mosehla, ’me boemong boo a kopa thuso lekaleng la Ntšetsopele ea sechaba lee esale le mo tšepisa ho mo letsetsa, ho fihlela kajeno.

’Malehloa o re ngoana oa hae o hlotsoe ho ea sebetsoa ka la leshome le metso e supileng khoeling ea bone, monongoaha, ke ka hoo a ileng a hloa qhooa ena ho kopa thuso.

Ngoana o bolaoa ke chefo ea litali,Ha Lets’umu

Ngoana ea lilemo li peli oa moshanyana o hlokahetse kamor’a ho ja chefo ea litali, maoba, ‘me ho utloahala sechaba sa motse se ile sa kopanya mapolanka ho mo etsetsa lekase hore a bolokoe kaha setopo se ne se se utloile bohloko. Tsena ke tsa Senqunyane Ha Letšumu, Thaba-Tseka.

Motsoal’a ntat’a mofu,’Mathabang Letšumu, o re tsena li etsoa bosieong ba ntat’a mofu kaha eo ngoan’a maloma’e esale a siea mosali le bana ba babeli, lilemo,’me ha ho tsejoe moo a teng, empa mabare-bare a mo supela Maseru.

Monghali Esau Maolla Horeng ea Litaba, kajeno, o boletse litaba tsa lelapa lena li otla pelo hobane mosali ee ho utloahalang a ena le bokooa ba kelello, ha ho letho leo a le jang le ho hloka liaparo le ngoana ee a seng a setse le eena. Empa o se a nyenyelitse Lekala la Ntšetso-pele ea Sechaba.

Bo-rasethunya ba bolaea bahoebi, Maseru

Lelapa la Moleleki le Brakafantein Ha ’Masempe Posholi, Mohalesuku, le bolokile mor’a lona(38) ea neng a thunyetsoe hekeng ea ha hae, Qoaling Ha Shelile, Maseru, ka Labone la beke e ka pele ho e fetileng. (09/05/2019)

Nkhono ’Manthabiseng Moleleki, ’m’a ea mofu, o re mora o ne a tsoa mosebetsing le mohatsa’e letsatsing le boletsoeng, ba mpa ba amoheloa ke lethala la likulo ha ba itokisetsa ho kena ka jareteng, li hlaha ho litlokotsebe tse neng li ikhakantse sa mokana li ne li ile shopong e ka har’a motse oo.

O re li ile tsa batla chelete eo li sa kang tsa e nka, e neng e le ka pokothong ea mora, ba khetha ho mo thunya ka tsebeng kulo ea tsoa ka mohanong, a timela hang-hang.Ho feta moo tsa thunya molekane oa hae seropeng a ba a potlakisetsoa ngakeng.

Lipatlisiso tsa sepolesa sa Ha Thetsane, li ntse li tsoela-pele le hoja ho ntse ho e-so tšoaroe babelaelloa ketsahalong eo.Mofu Matšela Letsema Moleleki o siea molekane, bana ba babeli ba bashanyana le ’ma’e.

Ho sa le joalo lelapa la Chaole Quthing Ha Mosuoe le re le tla boloka mor’a lona Thapelo Andreas Chaole,(32) ha Phuptjane e hlola letsatsi, ka mor’a hore le fumane tlaleho ea ngaka ea ka mor’a lefu, maobane, e boletseng hore o bolailoe ke ho senyeha ha likaolo tse ka hare tsa ’mele kaha kulo e thuntse lesapo la mokokotlo, ’me ea sitoa ho tsoela kantle ‘meleng.

Monghali Kabelo Chaole, moholoan’a mofu, o re sena se latela hore moena oa hae oa ho fela bareng ba bo ba babeli, a thunyetsoe khoebong ea hae e Lithoteng Ha Seleso, Maseru, bekeng e fetileng, ke rasethunya ea neng a tsamaea le ba bang ba babeli,’me ile ba ipha limenyane. Babelaelloa ha ba e-so tšoaroe. Lelapa le re le beha tsohle matsohong a Molimo.

Ho sa le joalo, lelapa le re sehopotso sa bophelo ba mofu se ntse se tla tsoela-pele hosane holong ea sekolo sa Mathomo sa Ha Seleso, ka Hora ea Boraro, motšehare oa mantsibuea, botenng ba sechaba le lisoaeli tsa habo joalo kaha e ne e le sesoaeli sa baesekele.

Malawi Congress Party e emisitse ho phatlalatsoa ha mohloli oa likhetho tse akaretsang tsa naha eo ka Taelo ea lekhotla le phahameng, ea kajeno.

MCP, e lla ka sephetho sa likhetho mabatooeng a leshome, ’me e kopa hore likhetho tseo li baloe Bocha botenng ba bohle ba kenetseng likhetho tsena.

Tlaleho ena e fanoe ke Morena Ramokhali Shale, e mong oa balebelli ba likhetho tseo. Ea neng a emetse likhetho tlas’a archbishop, folakheng ea mokha oa UTM, eena o buile sebokeng sa litaba, a re likhetho tsena li tletse manyofonyofo, li lahloe, ho qaloe qalong.