Adv Mafaesa o kulupanya sepolesa ka nyeoe lekhotleng la molao oa motheo

Lekhotla la Molao oa Motheo la Lesotho le ahloletse banna ba babeli khahlanong le sepolesa sa Lesotho se neng se ile sa hatikela litokelo tsa bona ka ho ba tšoara ka thoko ho molao, ho ba boloka setokising nako e telele le ho ba hanela ho bonoa ke ’muelli oa bona.

Kahlolo e baliloeng ka Lapele la beke ena e phatlalitse hore ts’oaro ea Abele Ramakatsa le Leemisa Sentje, ’moho le ho ba hanela ho kopana le ’muelli oa bona, ho tingoa monyetla oa ho emeloa ke akhente lekhotleng la ’maseterata ha mapolesa a ne a ilo kopa telefatso ea ts’oaro ea bona, ke tlolo ea molao oa motheo le oa tsamaiso ea linyeoe tsa litlolo tsa molao naheng ena.

Patantahali ea kahlolo e maqephe a fetang mashome a ts’eletseng, e bile e fane ka tataiso, malebana le hore na sebokohali sa phohomela sa sechaba se beng ka sona ba shoelang matsohong a sepolesa se lokela ho tholisoa joang. Lintlha tseo, li tla manolloa ke Adv Mafaesa Probonong ea Labobeli la beke ena.

Kahlolo ea Sakoane Sakoane J, e lumellanoe ka hohle-hohle ke Molefi Makara J le Moroke Mokhesi AJ ba neng ba mo mamelisitsi likhang tsa liakhente, mapolesa le batšoaruoa ka la leshome le metso e meraro la tlhakubele, monongoaha.

Adv. Napo Mafaesa le Adv. Rebokeng ba ne ba le ka lehlakoreng la balli ha mapolesa a ne a emetsoe ke Adv RJ Ts’eueu oa Bochochisi bo Boholo ba naha ena.