Moshanyana o nyamella lelapa, fono ea hae e arajoa ke mosali ea seng a tsejoa

Moshanyana ea lilemo li leshome le metso e supileng oa Naleli Ha-’Makhomo Makoanyane, Maseru, o tlalehoa ke ba lelapa la bo, esale a nyamela bosiung ba Laboraro la beke ena,’me ho fihlela lena, ha ho monyenyetsi ka eena.

Rakhali oa hae, Lieketseng Lepheane, o re o ile a tlaleheloa ka ho nyamela hoo, ’me ba kena letšolong la ho ’matla, ha botsoa e meng ea metsoalle ea hae e ileng ea re ha e tsebe moo a teng.

O re ho ile ha letsetsoa fono ea hae, e ileng ea arajoa ke mosali ea itseng o e filoe ke ba neng ba ile ba latola pejana hore ba tseba moo a teng, ’me ha a botsisisoa ka thata, a themelekana.

Leha ho le joalo, mosali eo fono ea Khabele e arajoang ke eena, o kopile ho se bue Moafrika Fm, a ba a re o makaletse ho utloa ba habo moshayana ba re fono eo kea mor’a oa bona, empa ho se joalo, ha lipotso li tsoelapele a qetella a re o e khutlisetsa ho beng ba eona.