Likhomo tse chopholisitsoe lesholu li batlisoa mong’a tsona

Ramotse oa Rothe Tšoeneng Ha-Mokhele, Maseru, o re likhomo tse ’ne tse neng li ile tsa ba matsohong a hae, li tlisistsoe ke e mong oa babusuoa ba motse oa hae, mesong ea Labohlano lena, li latiloe ke mapolesa a Morija, hona tsatsing leo.

Morena ’Mamopeli Mokhele o ne a ile a bolella Lehakoe la Litaba hore e mong oa  baahi, o ile a chopholisa lesholu likhomo tsee a li fumaneng li ntse li tsamaea ka har’a motse, ha a ne a lelekisa ea hae e neng e khaotse.

Likhomo ke tse latelang: pholo e tšehla bo bohlaba, e hatile molora ka litlhako kaofela, e choba le letšo, e’a hlotsa, e ’ngoe ke namane ea poho, e tšehla bo bohlaba, e hatile molora ka litlhako tsohle, e fula, ha ea boraro e le poho e hlaba, e fula, ea ho qetela ke poho e ntšo, e botha, e ketane molaleng.