Molula-setulo o re Letona le khelosa bahlanka tsamaisong ea molao, Berea

Molula-setulo oa Lekhotla la Puso ea Libaka la setereke sa Berea, o re letona le ntse le ingola meno ka pene ha le re lithakali li khelohe moralo oa lekhotla leo oa ntlafatso ea litsela, li isoe tikolohong ea habo le Mosalemane.

Monghali Pheta Letsoela o re ba se ba ile ba kopana le letona ka taba ena, empa ba hlolana, ka le reng letona le ile la tsitlallela hore lithakali li tsoe moralong oa lekhotla la setereke, o sebetse ho ea ka moo lona le hlokang ka teng.

Ntle le moo, Monghali Letsoela o re ha ba khotsofalle tsela ea monghali Litšoane Litšoane ea ho laela bahlanka ka fono, a ba fa litaelo tse ba khelosang tsamaiso ea molao. A bua ho Rentšalephola ea MOAFRIKA ka Labone lena, o itse ha ho moo likhofu li tla ea teng, letona le ka mpa la ea makhotleng.

Letona la Puso ea Libaka monghali Litšoane Litšoane, le re na litho tseo tsa k’hansele ’moka oo oa tsona oo li neng li o etselitse baphatlalatsi ba litaba o tla li thusa ka eng, hoba litaba tseo li builoeng ke tsa lona.