Ba habo monna ee esale a siea lehae, ba mo fumana ka thuso ea Moafrika Fm

Morena oa Ha-Tsolo, Maseru, o re o leboha bohle ba sebelitseng hore monna oa Makhalong Ha-Pitso Makoae, Qachaseneke a fumane ba habo hang hoba ho entsoe phatlatso ea ho ’matlisa Moafrika Fm, ka Labone la beke ena.

Morena Oicha Moopisa, o re o ne a lekile ka mekhoa eohle ea borena ho thusa hore monna eo, a tle a tsebe ho khutlela ha habo, empa a hloloa hoba moo a neng a fihla a kokota, o ne a qhalloa matsoho.

Lehakoe la Litaba le ne le ile la fumana ka e mong oa baahi ba Ha-Tsolo, ’Mapotlako Lintša, hore ho na le monna ea kulang hampe ea bitsoang Litjamela Makoae, ea neng a sa bolele hore ha habo ke kae ho fihlela ho fumanoa bukana ea hae ea ho eta, e mo supetseng moo ho boletsoeng.

 

Leha ho le joalo, moena oa monna eo Likotsi Matsoso Makoae, o itse o tlo etsa matsapa a ho mo lata, etsoe e se le lilemo tse kaholimo ho leshome a balehile hae, ka mor’a ho loana le batho ba bang tlung ea mothamahane, motseng oa habo.