Likhomo li tšoaroa li ntse li noa ka nokeng ea Tebe-tebe, Berea

Monna oa Masoeling Ha-Patso, Berea, o re likhomo tsa hae tse supileng li tšoeroe ke batho ba Ha-Ntlama, ka mor’a ho li fumana li ntse li noa metsi ka nokeng ea Tebe-Tebe, ka Labobeli lena.

Monghali Moeketsi Mokokomali, o re batho bao, ba neng ba bile ba ntse ba qhoba liphoofolo tse ling tsee ba boletseng li ne li tsoa leboelleng, ba itse ba tšoere tse ka nokeng hobane ba belaela hore le tsona li tsoa hona leboelleng leo.

O re o ile a leka ho li lata motseng o boletsoeng hona ka Labobeli, empa a bolelloa hore o lokela ho lefella khomo ka ’ngoe, makholo a mararo a motso o mong a Maloti, ’me a neoa tse tšeletseng, ha sala e le ’ngoe.

Monghali Mokokomali, o re li lokolotsoe ka le reng ee a e siileng, e tla lokolloa ha a lefeletse tse ling, ’me tsebong ea hae ke hore phoofolo ha e fumanoa leboelleng la motse, e lefelloa Maloti a mahlano, athe le motseng o mong ke a leshome.