Lelapa le nyamelloa ke chelete le liphahlo ka mohlolo, Maseru

Mosali oa T.Y Ha-Tšekelo, Berea ea lulang Ha-Seoli Maseru, o re lelapa la hae le nyamelloa ke liphahlo le chelete ka mohlolo, ’me o balehela qhooeng ena hobane ho se ho nyametse maleiri le lepae tsa lesea lee a le lebeletseng, bekeng e fetileng.

’Makhauta Motinyane o re ho nyamela ha liphahlo, ho ne ho simolle ka mongoaha oa 2015, moo ka keresemese ea selemo se seng, a neng a fumane liphahlo tse ncha tsa bana ba hae, li se li le sieo, ha a ne a re o ba apesa tsona.

O re ka ha ke momameli oa Moafrika Fm, o lumela hore thuso o tl’o e fumana ka ngaka e phephethelang baloi ka letsoho le ho phatsa, Sandawana ka moo e tsejoang ka teng, hobane boholo ba batho ba hlaheloang ke litaba tse kang ena, bo fumana tharollo.

Leha ho le joalo, presidente ea baloi e bua nakong ea Hora ea Litaba ka Labobeli lena, e re mokuli eo, a ke a itlalehe moo e sebeletsang teng ha e tlile Maseru, e ke e tlo khokhohanya puo, e tle e tsebe se lokelang ho etsoa ho eena.