Lekhotla la maipiletso la Lesotho le tla hloloa ho lula ke bohloki

Tsa morao-rao li re lekhotla la maipiletso la Lesotho, ha le na ho lula ka lebaka la tlhokahalo ea lichelete, hoja Mongolisi oa lona, Adv Mosito Rabotsoa a ne a ile a bolella Lehakoe la Litaba hore litokisetso tsa ho lula ha lona, li se li phethetsoe.

Monghali Rabotsoa o re joalo ka mehla, boholo ba litho tsa lona e ne e tla ba baahloli ba tsoang kantle ho naha, ka motsoako o seng mokae oa baahloli ba Lekhotla le Phahameng la Lesotho.

Mafekefekeng a libekeng tse peli tse fetileng, ho ne ho be le maikutlo a reng ho ka etsahala hore selemong sena, lekhotla le okametsoeng ke moahloli Kananelo Mosito le hloloe ho lula, ka lebaka la khaello ea lichelete ’musong ona oa lephele.

Ho sa le joalo, makhotla la Lesotho a bommaseterata a ntse a sa sebetse; bahlomphehi ba hlalosoa ba lla ka moputso o sa lumellaneng le maemo a bona a thuto le a mosebetsi, ’me ’muso o ntse o e-s’o re letho ka taba ena.