Ranku-likae oa Mokhotlong esale a letela chelete ea boea ba likhutšoane tsa hae

Rankulikae oa Pae-lea-Itlhatsoa Ha-Makhaphela Sekonyela, Mokhotlong, o re ho fihlela lena, o ntse a e-so fumane chelete ea boea ba likhutšoane tsa hae tsee a li kutileng khoeling ea bone le ea borobong ngoahola, ka mor’a hore bo isoe Thaba-Bosiu.

Monghali ’Molai Leakha, o re ho se fumane chelete eo, ho entse hore a hloloe ho lefella morali oa hae karolo ea bobeli ea sekolo monongoaha, hoba o bile a e lelekelloa ka Lapele la beke ena, ’me ha a na mokhoa oa ho mo lefella.

O re e le bo-ranku-likae, ba tseba ba fumana licheke, empa morao tjena, ba bolelloa hore ba fane ka linomoro tsa lipolokelo tsa bona, molemong oa hore ba tle ba lefshoe, le hoja a utloetse hore ba se ba hashaletsoa feela.O kutela sekiring se Mapholaneng, Masoleng.