Baahi ba Masowe 3 ba re ba senyeheloa ke matlo ke ho qhomisa ha morafi

Baahi ba Masowe 3, Ha-Kuenane Matsoso, ba re ho qhomisoa ho etsoang motseng oa Likotsi Ha-Tšiame, Maseru, ho ba senyelitse matlo, ’me ba bile ba etsa qeto ho bea majoe ka tseleng e le ho ipelaetsa khahlanong le morafi oa sebaka seo, ka Lapele la beke ena.

Ea buileng lebitsong la bona, ’Mathooase Maqelepo, o re ba ile ba rera ho bea majoe a ileng a tlosoa ke sepolesa sa Ha-Thetsane ka le reng ba sitisa phallo ea sephethe-phethe.

O re ho qhomisoa hoo ho etsoa ka makhetlo a ’maloa ka khoeli, ’me ba ee ba tsebisoe ke morafi ha tšebetso eo e tlo etsoa hore ba bule lifensetere, ’me ho fihla moo ba khathetseng ke boemo bona.

’Mathooase ea reng ntlo ea hae e likamore tse leshome le metso e ’meli e amehile, o re ho tloha sethathong ha ba bona hore ba senyeheloa, ba ile ba atamela mafapha ’ohle a amehang, a hloloa ho ba thusa, ha ba tla hloella qhooeng ena.