Lekhotla le ilo tsitsisa bolulo ba bahlolohali ba Lechalaba ka Labone

Taelo ea Molefi Makara J. ea Labotšelela le fetileng, e tla phethahatsoa ka Labone lena, ke Mongolisi oa Lekhotla le Phahameng la Lesotho a tsamaisoa tsela ke Lengosa la lona lekhotla leo, tlas’a leihlo le nchocho la mapolesa a Ha Mabote.

Adv. Mosito Rabotsoa o re tsohle tse hlokahalang ho phethahatsa taelo eo, li se li entsoe, ho kenyelletsa boithuto ba boemo bo renang moo, boo ba fumaneng hore ha bo jese litheohelang.

Phethahatso ea taelo eo, e hlalosoa e tla nolofaletsa e mong oa bahlolohali ba Sello Paul Lechalaba, nkhono Nthatisi, ho khutlela hae ka mor’a nako e ka etsang likhoeli tse tšeletseng a phaphathehile, a baleha bohale boo a reng bo ne bo se bo le haufi le ho mo leka.