Bommaseterata ba ngalile mosebetsi, ba batla nyollo ea meputso

Makhotla a ’Maseterata a kene letsatsing la boraro a sa etse mesebetsi ea ’ona e tloaelehileng. Bahlomphehi ba hlalosoa ba hana ho etsa mosebetsi ka le reng ba batla keketso ea meputso oa bona.

Lehakoe la Litaba la MOAFRIKA le fumane hore le hoja liofisi li butsoe, ha ho letho le sebetsoang, ho tloha kamohelong ea linyeoe tse ncha, ho ea kena ho rimantoeng ha baqosuoa.

Ofisiri ea liphatlalatso ea lekhotla la ’Maseterata oa Maseru, e re e ke ke ea re bahlomphehi ba seteraekeng hobane ha ba e-s’o cho joalo, empa ea hore mosebetsi ha o etsoe, eona e bonoa ke bohle.

Litlaleho tse seng li kene ka Lehakoeng la Litaba li re boemo bona bo aparetse naha. Semaka ke hore e be ho fihlela lena le holimo Letona la Toka ha le e-s’o re letho ka boemo bona bo hlobaetsang.

Lehakoe la Litaba le hlotsoe ho fumana phala ea ’Muso oa Lesotho, ho fumana hore na ’muso o ntse o etsang ho rarolla boemo bona, molaetsa o siiloe fonong ea eona. Tebello ke hore e letse ha e fumaneha.

Sepolesa ka phala ea sona Mpiti Mopeli se re se ntse se lokolla babelaelloa ba litlolo tse bobebe tsa molao naha ka bophara, se ba fa matsatsi a ho ea itlaleha, ntle le ba inehetseng ho sona, ba baleha bohale ba sechaba.