Baits’okoli ba koetlisetsoa poloko le ho hlokomelisoa ka mafapha a ka ba qhekellang ho tseteleng chelete

Baetellipele ba baitšokoli ba toropo ea Maseru, ba ile ba koetlisoa ke banka e ’ngoe ea libanka tsa Lesotho, ka Labobeli la beke ena, holim’a poloko ea lichelete ho li sebelisa le ho hlokomelisoa mafapha a ka bang kotsi ho bona ho ba qhekella ka hore ba tsetele lichelete tsa bona, ho oona.

Ea buileng lebitsong la bona, monghali Tšolo Lebitsa, o re ba thabetse ho fumana malebela a ba lemohisitseng litsela tse ka bang kotsi ho bona, ’me tebello ke hore koetliso e tlo fetela ho baitšokoli ka kakaretso ka la mashome a mabeli a metso e mene, khoeling ena.

Ho sa le joalo, moifo oa batho ba babeli ba mokhatlo oa Khathang Tema Baitšokoli, o tla re khalo naheng ea Kagistan, pel’a Rashea, ’mokeng oa lefatše oa mekhatlo ea baitšokoli, o tla qala ka la borobong ho fihlela ka la leshome le metso e ’meli khoeling ena.

Monghali Tšolo Lebitsa o re, ba ilo fana ka litlaleho tsa bophelo ba baitšokoli, linaheng tsa habo bona, le ho etsa meralo ea ho ea pele, ’me ba tla qetella ka ho khetha komiti ea tsamaiso ea mokhatlo o moholo oa lefatše oa bona.