Tšisinyo ea mokhethoa oa Malingoaneng e tla thusa liphofu tsa mapolesa

Mapolesa a likoeta a haufinyane a hakoa ke letlooa la toka, monna kapa mosali a iphumana a eme ka pel’a lekhotla la boahloli, a arabella liketso tsa hae tsa bokoeta tse qeteletseng ka ho nka bophelo ba babelaelloa ba litlolo tsa molao le ba batho ba se nang molato.

Probono ea Labobeli lena e otlollotse se lokelang ho etsoa ka tšisinyo ea Monghali Serialong Qoo ,e ileng ea ananeloa ke paramente ka La-pele la beke ena, e reng mapolesa ‘ohle a belaelloang lipolaong tsa babelaelloa a qosoe makhotleng a boahloli a naha ena.

Tšisinyo eo, monghali Qoo o re e bile ea tšehetsoa ke bohanyetsi le ke ba ka pusong e leng benghali Selibe Mochoboroane, Mathibeli Mokhothu, Motlohi Maliehe le Motsoahae Thabane.

A bua ho Probono le Rentšalephola tsa Labobeli lena, o bile a re mosebetsi o se o sallane le Tlelereke ea Lekhotla la Sechaba, e leng oa ho kopana le Mongoli e Moholo oa Lekala la Sepolesa ka tšoaro ea banna le basali bao ba belaelloang litabeng tsa bokoeta.

Lehakoe la Litaba la MOAFRIKA le tla sala taba ena morao ho tloha joale, ’me le kopa bohle ho le thusa hore banna le basali bano ba likoeta tse apereng seaparo sa sepolesa se hlomphehang, sa naha ena se bile se sebelisa thepa ea sepolesa li hlahe ka makhotleng, li tsoe li fetela chankaneng, e leng moo ho khoesoang litloli tsa molao ka ho fapakana ha tsona.