Monna le mosali ba ipitsang masole, ba utsoetsa batho

Moahi oa Marabeng Ha Seeiso, Berea, o re o etsoe ka liphalana, ke monna ea ileng a mo qhekella ka hore o tla mo fumanela lithuso tsa ho fuoa korosari, ho se seng sa litsi sa tšireletso, Maseru, kaha a sebetsa teng, shoalaneng ea Labone le fetileng.

Morali oa lehlatsipa Lineo Mohlomi, o re monna eo, o batlile ’m’ae makholo a mane a Maloti, ao a bileng a kalima, kaha eo, a ne a re o il’o tsela koloi ee ba tlo tsamaea ka eona ho leba setsing, ha ’Mapali Mohlomi a se a kopile lengolo le mo pakang moreneng.

Lineo o re ’m’ae ha a khutla moreneng o fumane monna eo ea ipitsang Mofolo, a inne libono metsing ka chelete, a bile a utsoitse lilampa tse peli tse neng li behiloe betheng.

O re monna ’mommoring ona, o sebetsa le mosetsana ee a neng a mo bitsa Tšeli le hoja bona ba iphumanetse mabitso a hae e le Relebohile Mashapha, athe a mohlankana ba hlotsoe ho a fumana ka mokhoa oo ba iphumanetseng a eo.

Keletso ea Lehakoe la Litaba e bile hore ba e’o tlalehela morena le sepolesa. Mohala oa monna o ne o sa fumanehe ha oa mosetsana o ile oa arajoa ke monna ea ileng a o koala ha a tobana le lipotso. Ba ipitsa masole.