Moahi oa Fobane o fana ka boeletsi ho morena oa Koalabata

Moahi oa Fobane Ha-Tumo, Leribe, o re morena oa Koalabata, Berea, ee a reng o tšoentsoe ke litlolo tsa molao tse etsoang ke bashanyana ba sa tsoa tsoa Thabeng, o lokela ho bitsa bontat’a bashemane, ba ba bololitseng, basuoe, babolli le bona bashemane ho tla buisana ka boemo boo.

Monghali Ntabejane Lefume, ea tummeng ka la Morusu, o re ha morena a ka bitsa mafapha ao, ke oona a tlang ho ntša botsikoane bo keneng bashemane bao ka lihloohong, ’me litaba tseo bashemane ba reng ba li tseka, li tla emisa ka ho panya ha ntši.

Leha ho le joalo, morena ’Makhomo Makoanyane, o re o ne a sa lemoha lehlakore leo la taba, ’me o se a bile a tatamala ka keletso eo, hoba see a se hlokang, ke khotso ea metse e ’meli ee a e busang e loantšanang ea Naleli le Koalabata, moo ho seng ho hlahile mafu.