Labobeli lena ke la phethahatso ea taelo ea moahloli Molefi Makara nyeoeng ea Lechalaba

Taelo ea Molefi Makara J. e re Lengosa la Lekhotla le Phahameng la Lesotho le Mongolisi oa lona, ka tlatsetso ea sepolesa sa Ha Mabote le bulele bahlolohali ba Paul Lechalaba liheke, ba kene le ho tsoa ha bona ka bolokolohi. Taelo ena e ile ea etsoa ka Labotšelela la beke e fetileng nyeoeng e neng e ile ea khakhatha ho ea kena lihoreng tsa bosiu.

Taelo e bile e re mahlokore a amehang nyeoeng e kenyelletsang tumello ea ho bolokoa ha Hloohotšoeu Lechalaba, setlohlolo sa Nkhono Nthatisi, a tla fuoa letsatsi la ho mameloa ha likhang tse tlang ho isa polokong ea Hlooho-tšoeu, e lokelang ho ba mafelong a beke eona ena.

Balli nyeoeng ena ke Nthatisi le Nthati Lechalaba, ha baikarabelli e le nkhono Makhala Lechalaba, Lebohang Lipholo le Mathabeng Khopotso Lechalaba. Nkhono ea seng a haba selemo a phela ka mor’a sehlahla, o re thabo ea hae ha e na tekanyo, ha e le mona a fumana monyetla oa ho khutlela hae, le ho ea boloka setloholo sa hae.