Morena o tšoenngoa ke lipolaeano tse etsahalang metseng ee a e busang, Berea

Morena oa sebaka oa Koalabata, Berea, o re o se a buisane le ba lebollo motseng oa hae hore ba ke ba ikopanye ba tsebe ho ea buisana le bahlankana bana ba tsoang thabeng,ka lipolaeano tsena tse ngata,tse etsahalang metseng ea Naleli le Koalabata, Berea.

Morena ’Makhomo Makoanyane, o re sena o se bua a ipapisitse le ntoa e bileng ka Labosupa la beke e fetileng, lipakeng tsa bahlankana ba Naleli le Koalabata e qeteletseng ka mafu a bahlankana ba ka bang bane, ha ba bang ba ’maloa ba ile ba hlaha likotsi tse mpe.

O re bahlankana ha ba botsoa ka thata see ba se tsekang, ba re ba ntse ba lateletse litaba tsa lefu la monna ea neng a bitsoa Taba-li-thata ea neng a shoe khale a bolaeloa Matšeng, Berea, ka mabaka a hae a botho,’me taba ena, e se e na le lilemo tse tharo, e tsoela-pele.

Morena ’Makhomo, o re boemo bona bo se bo bile bo thibela sechaba sa Koalabata ho feta ka har’a motse oa Naleli hoja litšebeletso tsohle se lokela ho li fumana teng, joale se matsoalong.