Monna o phetela lelapa masisa-pelo a ho phonyoha lefu, Mants’onyane

Lelapa la Tšehlo le Mantšonyane Ha-Letuka Thaba-Tseka, le re le ile la potlakisetsa setho sa lona sepetlele St. James ka Labosupa le fetileng, ka mor’a hore se fihle lapeng se tšohile hampe se re se phonyohile lefu ka mohlolo.

’Maliepo Tšehlo o re Motebang Tšehlo, o fihlile a pheta hore ho fihlile batho ba ileng ba pota-pota motebo oo a neng a le ka ho oona, nakong eo a utloa lintja li bohola ka matla, bao ba qhibolla moaho oa motebo.

O re o boetse o itse o ne a ile a utloa batho bao ba bua hore hang ha ba ’mona, ba mo thunye, leha ho le joalo, o ile a phonyoha ka mohau oa Molimo, a matha har’a lefifi la bosiu, a ea oa ka har’a khohlo, ha letsatsi le hlahlamang le haba ho likela, a iqekela hae.