Mohlomphehi Mohlophisi e Moholo o rarolotse fito la ngolisong ea makoloi

IMG_1533816110516Kamor’a ho fumana makoloi a hae a filoe linomoro tse fosahetseng, e ’ngoe e bile e fosahetse ka lintho tsohle, e leng mabitso, linomoro le matšoao a koloi, morena Sebonomoea o ile a ikisa ntlokholo ea lefapha la ngoliso ea makoloi, Maseru.

Teng o ile a bolelloa ke ofisiri e kholo hore ba neng ba mo sebeletsa Teyateyaneng, ba fositse mokubetso, a mpe a be pelo e mongobo, a khutlele teng tsohle li tla khutlisetsoa mocheng.

Kamor’a ho qapolla taba ena, Horeng ea Litaba, bamameli ba ile ba kena ba re taba eno ea ho fana ka linomoro tse ncha makoloing, ke kobo-anela, bona ba amohetse boemo boo.

Ofisiri e kholo ea Lekala e thusitseng morena Sebonomoea sa bobeli sa Makholokoe, e itse liphoso tse ling li lokela ho romelloa Khauteng ho beng ba marang-rang ana a ba sokolisang, ho ea rarolloa.

Thuto leruong la mofuta oa kolobe o bitsoang Durok

MAIN-Pigs-infected-post-weaning-are-particularly-susceptible-to-respiratory-diseases-c-no-creditMoahi oa Maputsoe Ha-’Mathata, Leribe, o fane ka thuto leruong la mofuta oa kolobe o bitsoang Durok ee a reng e na le phahello e kholo thekisong ea eona ea nama, ka baka la ’mele o moholo oa eona.

Monghali Ntsane Lipholo ea tsebahalang ka la Litjepa, o re ona ke mofuta o fepehang ha bobebe hoba o noa metsi a mangata le ho nyella malinyane a mangata.

O re motho ea e ruileng o mo khothaletsa ho ba makhethe le ho qoba ho e boloka ka har’a qhafutso, hoba e ka ba le bothata ba manonyeletso. Litaba tsena o ne a li bua lenaneong la Rentšalephola la Labobeli la beke ena.

Lelapa le beha litaba tsa ho shoa ha mor’a lona ho Molimo

Lelapa la Pitso le Makhalaneng Ha-Raboletsi, Maseru le re le tla boloka mora oa lona ha Motšehanong, e hlola matsatsi a mane, ka mor’a hore le fumane tlaleho ea ea ngaka ea ka mor’a lefu e boletseng hore o bolailoe ke matetetso a tletseng ’meleng le mali a rothetseng ka hare.

Monghali Tseko Pitso o re ho latela litaba tse pota-potileng ho timela ha moena eo oa hae, lelapa le fihletse qeto ea hore ba khaohane le tsona, ba boloke mofu, taba li fele, hoba le tlolisoa khati ke bahlanka ba tšireletso ha ba lokela ho phethahatsa toka, holim’a babelaelloa. E tla phethoa ke Molimo o matla ‘ohle.

O re lelapa le fumane hore mor’a lona o ne a khakhatheloe tlung ea mothamahane, Tšieng Ha-Abia, ka mor’a hore a qoaketsane le ngoanana ea ileng a tsebisa setho sa sesole se sa tsejoeng lebitso le lepolesa la motseng,’me ha buloa nyeoe sepoleseng sa Lithoteng ea peto ea leqhekoana.

Litabeng tsena leqhekoana lee ho buuoang ka lona hore le ile la betoa ke mohlankana eo, le ne le bue phatlalatsa ho Renyebekolla Taba ea Moafrika Fm, hore taba e joalo ha ea etsahala.

Mohlankana o nyamela la koloi le makholo a ts’eletseng a Maloti, Maseru

Moahi oa Ha-Matala, Maseru, o re mohlankana ee a neng a ntse a mo thusa ka mesebetsi lapeng ha hae, esale a nyamela ka koloi ea hae ea Corolla Dif, ea linomoro tsa M1413, e bothokoa bo benyang ka Labotšelela la beke e fetileng, le makholo a tšeletseng a Maloti, hoja a ne a mo romile mabenkeleng.

Monghali Rankalimeng Serero, o re o ne a ile a bolella mohlankana eo ho ea fetola e ’ngoe ea thepa ee a neng a e rekile, eaba ke ho nyamela ha hae. Lebitso la hae ke Pheko Nkopane, ke motho e mosootho, ea linko le mahlo a maholo.

Batho ba sa tsejoeng ba senya lipeipi tsa metsi, Berea

Mok’hanselara oa Ha-Foso le Ha-Sepinare, Berea o re peipi ea metsi e fepelang libaka tsa tikoloho eo, e atisa ho senngoa ke batho ba sa tsejoeng,’me metsi a be sieo nako e telele.

Monghali Mahlehlenyane Moletsane o re e se le ka makhetlo a kabang mane ho senngoa peipi eo, ’me sena se emisa litšebeletso, hoba o bua tsena metsi ha a eo, joale o hlokomelisa lisenyi tseo, ho emisa ketso eo.

Litlokotsebe li senyetsa baits’okoli Mafeteng

Baitšokoli ba bane ba sebeletsang renkeng e ncha Mafeteng, ba fumane mek’huk’hu ea bona e qhaqhuoe, e bile e utsoelitsoe thepa e neng e le ka hare ho eona, ke litlokotsebe, ho bo neng bo sela Lapele la beke ena.

Ea buileng lebitsong la bona, monghali Baleng Kamolane, o re o ile a bona ka mok’huk’hu oa hae pele hore ho sentsoe, a ba a fumana le ho ba haufi le eena hore ba senyelitsoe.

Litaba tsena li tlalehiloe sepoleseng ka mor’a hore baitšokoli ba eletsoe ke k’hansele ee ba tla boela ho eona ka Laboraro la beke ena.

Lesotho le lokela ho thusoa ho matlafatsa le ho tsitsisa boits’okuli

Monghali Tšolo Lebitsa o re seboka sa machaba sa baitšokoli, se lumellane hore Lesotho ke e ’ngoe ea linaha tse lokelang ho thusoa ke mokhatlo ho matlafatsa le ho tsitsisa boitšokoli.

Tsena, Lebitsa la Baitšokoli, le li bua e le mofetolelo oa tsa leetong lee ba tsoang ho lona Kajakistan, sebokeng sa lilemo-tharo sa Streetnet, e leng mokhatlo oa baitšokoli oo Khathang Tema Baitšokoli, e seng e e-na le lilemo tse ka bang leshome le metso e tšeletseng e le setho sa oona.

Thuso eo, e hlalosoa ke eena e tla kenyelletsa ho thusa litho tsa mokhatlo oa habo ho kenya letsoho tlhahisong ea thepa e hlokoang ke sechaba le naha ena, li tlohe boemong bona ba ho reka le ho rekisa lintho tse etsoang ke baitšokoli ba linaha tse ling, athe mokhatlo oa bona, har’a tse ling o loanela hore Lesotho le ikemele tlhahisong ea lijo.

Basotho ba thabela kahlolo ea lekhotla la molao oa motheo

Basotho ba thabetse manollo ea kahlolo ea lekhotla la molao oa motheo malebana le ho tšoaroa le ho chochisoa ha linyeoe tsa litlolo tsa molao ka har’a Lesotho, e fileng mapolesa, bachochisi le bo-mmaseterata tataiso e lintlha li leshome le metso e meraro, tse seng li lokela ho lateloa ntle le phoso.

Tlhaloso eo, e ile ea fanoa ke Adv. Napo Mafaesa, akhente ea Maseru e neng e buella Abele Ramakatsa le Leemisa Sentje nyeoeng e neng e mametsoe ke SP Sakoane J, EFM Makara J le Moroke Mokhesi JA ba lekhotla le phahameng la naha ena. Mr Mafaesa o ne a bua Probonong ea Labobeli la beke ena.

Adv. Ramatsoai Tšeuoa ea neng a bua nyeoe ena lebitsong la Mochochisi e Moholo, o re ha ba e-s’o ithute lintlha tsohle tsa kahlolo ena, empa, moo a utloileng teng, o fumana e le kahlolo e ntle e sa hlokeng hore ba ipiletse, le ha ho le joalo, o re liqeto ke tsa DPP e leng eena mong’a hae.

Captain Mahase, ofisiri ea sepolesa sa Lesotho e seng e le phomolong, a bua hona lenaneong leo, o itse tataiso e supiloeng ke Lekhotla la Molao oa Motheo, ha e ncha, o makala ho utloa hore ha e lateloe, empa sepolesa se bile se e-na le baeletsi ba molao ba lokelang ho sebelisana le bochochisi ho thusa mapolesa ho nepa.Phala ea sepolesa e boletse hore ha e na tseba ho bua ka taba ena kaha e e-so bone kahlolo.

Sechaba se thibela morafi ho rafa koari ntle ho litumellano, Butha-Buthe

Mok’hanselara oa Tša-le-moleka B04 Matona Chitja o re sechaba sa Sekubu se thibetse literaka tse neng li il’o rafa koari e ilo sebetsa khahong ea lifeme tsa Ha Belo Botha-Bothe, ka Labobeli lena, hobane se re ke ka thoko ho litumellano.

Ea buileng lebitsong la Sechaba, o re ba thibile literaka tseo ka lereng ha li rafa koari sebakeng sa sona, se lokela ho etsetsoa lintlafatso tse kenyeletsang tsela e le ho busetsa ho sona,’me mok’hanselara le mokhethoa ha ba tsebe letho ka morero oo o sa ba kenyelletsang.

Monna o kena sepetlele ‘Mamohato kamor’a ho tokhotsoa ke sepolesa Lithoteng

Mosali ea Mantšonyane Ha-Long, Thaba-Tseka, ea lulang Ha Seoli, Maseru, o re eena le monna oa hae ea sepetlele ’Mamohato, ba tokholitsoe ke mapolesa a Lithoteng ka lereng ba ba tloaela hampe, ka ho baleha ha a ne a emisa koloi e a neng a ntse a ithuta ho e qhoba, hoseng ha Labobeli la beke ena.

‘Maneo Kuebu o boleletse Lehakoe la Litaba la Moafrika hore monna oa hae, o ne a ntse a mo ruta ho qhoba, ea re ha ba le tseleng e lebang mosebetsing oa boitšukuli, ba kopana le mapolesa a ileng a ba emisa, empa ka ho tseba hore ha a na lengolo la ho qhoba, a se ke a e emisa.

’Maneo o re ke moo mapolesa a supileng a kenyeletsang la mosali, a ileng a mo molelekisa ho fihlela a thibella koloi ea hae, a mo fumana, ’me a mo tokholletsa le monna oa hae ea bileng a robeha maoto ka bobeli, ha eena a lemetse mahlo, molomo le hlooho, ngakeng o tlamisitsoe a ba a lokolloa.

Lehlatsipa le fihlile Lehakoeng la litaba le le maqeba a mabe,‘me Lehakoe la le eletsa ho ea ntlokholo ea Sepolesa ho ea tlaleha litaba tsena, la khutla le filoe foromo ea ngaka le ho laeloa ho khutlela teng ka Laboraro lena kaha mapolesa ao le oona a bitsitsoe.