Lelapa le patlong ea mor’a lona

Moahi oa Tsoelike Ha Matlali, Qachaseneke, o re lelapa le tsietsing ea bophelo ba mora oa ’mangoana’e, oa Ha Mohlapiso Phuthing, ho na seterekeng seo, ea neng a e-tsoa Marisebeke RSA, ee fono ea hae eseng e sa fumaneha kamor’a ho mo bolella hore o tsietsing.

Monghali Tokelo Kolane o re Moeletsi Lepheana o ne a etsoa Marisburg moo a seng a phela le ’ma’e, a tlile ho bao a neng a tlo hatisa ‘mino le bona, ka Lesotho, ’me e mong mohala oa hae o seng o sa fumanehe hoj’a  a ne a se a mo tšeletse sekete sa Maloti fonong.

O re o ne a ile a mo bolella hore o leba sepoleseng sa Ha Thetsane, ka Lapele le fetileng, kaha sa Pitso-Ground se ile sa mo leleka ka lereng o se a hlotse matsatsi a mangata, ’me le Marisburg ha a letsetsa o fumane hore ha a e-so fihle.

O re ke mohlankana ea lilemo li mashome a mabeli a metso e mene, ea mosootho ka lebala, ea lekaneng hantle ka bolele le ’meleng, ea sehlotho. O re eena o ile a tlalehela sepolesa sa Qachaseneke.

Mapotoana a Ha Motjoka Berea a khethile komiti ea Lekala ka Labosupa la mafelo a beke ka katleho, ho rialo motlatsi oa seboholi monghali Malakoane Macheli.

Komiti e eme joana: Molula-setulo ke monghali Makakole Sakoane, a tlatsoa ke Tsotang, ramatlotlo ke Thabo Ranko, bongoling ea eba ‘M’atšepo Mosoeunyane, ea tlatsitsoeng ke ‘M’asetšoana,seboholi ke Raliapeng ea tlatsitsoeng ke Malakoane Macheli, ha litho e le ‘M’aretšepile, Puseletso, Aleta Tjamela le Palesa Khoele.

Mapotoana a Ha Motjoka Berea a khethile komiti ea Lekala ka Labosupa la mafelo a beke ka katleho, ho rialo motlatsi oa seboholi monghali Malakoane Macheli.

Komiti e eme joana: Molula-setulo ke monghali Makakole Sakoane, a tlatsoa ke Tsotang, ramatlotlo ke Thabo Ranko, bongoling ea eba ‘M’atšepo Mosoeunyane, ea tlatsitsoeng ke ‘M’asetšoana,seboholi ke Raliapeng ea tlatsitsoeng ke Malakoane Macheli, ha litho e le ‘M’aretšepile, Puseletso, Aleta Tjamela le Palesa Khoele.

Ngoanana ea lilemo li hlano o etsoa ketso e bohloko Mafeteng

Ngoananyana ea lilemo li hlano oa RSA o entsoe ketso ke monna ea sa tsejoeng oa koloi ea Honda Fit e thokoa, e senang linomoro, kamor’a ho ba palamisa le e mong ea lilemo li peli, a ne a ile a ba fumana tseleng e lebang shopong e haufi le lelapa la moo a fihletseng ho lona Khubetsoana Ha ’Makarabo ’Nau Mafeteng, ka Labosupa le fetileng.

Malom’a ngoanana o re lehlatsipa le ne le ntse le tsamaea le ba bang, ea ba ho fihla koloi ee moqhubi oa eona a ileng a qoqisa bana sa mokana a ba tseba, a palamisa ba babeli bao, a tsamaea le bona.

O re mochana o mo boleletse hore tseleng ke moo monna a ileng a theola eo e mong, ha sala eena, a mo rekela masimba le ho mo etsa ketso e bohloko, a qetella ka ho mo theola ka koloing a ntse a bile a mo babola ka litlelapa.

Ngoana o fumanoe tseleng ke basali ba motseng oa Matholeng Ha Ntlama, a ntse a bokolla a sa tsebe moo a tšoanelang ho leba teng, kaha a sa tsebe sebaka seo hantle a chaketse maloma’e,’me basali ba ile ba mo batlisa ba qetella ba fihlile ha monna ea ileng a mo tseba.O ile a isoa ngakeng ka Labosupa le ka Lapele lena

Lipolomiti li faretse le kamor’a kahlolelo ea lekhotla le Phahameng

Bo-ranku-likae ba Mokhotlong ba ngoletse ofisi e Petoria Afrika Boroa, hore e tiise kapa e latole hore e ngoletse ofisi ea Lekala Temo Maseru Lesotho, lefapheng la phano ea lipolomiti.

Ranku-likae oa Ha Mojakisane Mokhotlong, monghali Khotsang Moshoehsoe, o re ofisi e hana ka lipolomiti ka lereng e na le nyeoe e ritetsoeng ke k’hampani ea Mahloenyeng  ka lebaka leo, e keke ea fana ka tsona tlas’a maemo a joalo.

Ntlha e ’ngoe eo ba its’oareletsang ka eona, ke hore setereke sa Mokhotlong ha se na ngaka ea liphoofolo, e teng ke ea Botha-Bothe, eo ho seng litlhopho hore e ka thusana.

Mookameli oa kh’ampane ea Mahloenyeng,‘M’amotheba Mphafi, o tiiselitse Lehakoe la litaba hore ba balehetse lekhotleng ho ea tseka hore na hobaneng ba keke ba fuoa polomiti empa lekhotla le hlakotse molaoana o thibelang thekiso ea boea.

’M’a o re mora o teteketsoe sethunya see a se nang sona Maseru

Moahi oa Mosikong Tšenola Ha-Moeketsi Mothobi Maseru, o re mora oa hae, o tetekiloe hampe ka Labosupa le fetileng ke sepolesa sa Ha Mabote, kamor’a ho mo lata khoebong ea hae, se re se mo belaella ho ba le sethunya ka thoko ho molao.

’Masejooa Motaung o re mora o mo boleletse hore mapolesa a fihlile khoebong ea hae a tsamaea le eena ho leba sepoleseng, moo a ileng a mo hatikela ka lieta,’me ha a tsebe hore na o isoa khotla neng, le hore mapolesa a hanne ka mabitso a oona ha a batla ho tseba ba ntseng ba sebetsa taba ena.

O re khoebong ea mora ho kile ha ba le motho ea thunngoang, empa a se ke a timela, mapolesa a Ha Mabote a tsebisoa, joale ke mona ho se ho belaelloa eena ka sethunya.

Linaoa tsa pinto tsa Makhalaneng li fumaneha MOAFRIKA

Linaoa tsa pinto tse hlahisitsoeng ka mokhoa oa tlholeho, mobung oa Koung Ha Chere Makhalaneng, li fumaneha ka bongata, ho tloha ka lillithara tse leshome ho ea bongateng ba metimpana.

Motho kapa batho ba li hlokang ka bongata, ba letsetse MOAFRIKA FM ba buisane le Morena Mokholoane Sebonomoea Ramainoane ba etse litokiso tse akhang ho lefella thepa pele e tloha setorong.

Morena Mokholoane o re ha li rekisoe ka mokitlane kapa otara, o hloka chelete ea lipampiri letsohong, e be ’nehe ke u nehe.

Tlhokomeliso ka boemo ba letamo la Metolong

Letamo la Metolong le hlalosoa ke phala ea WASCO, le qalile ho tšoloha metsi a mangata, ho tloha ka Labobeli la beke ena, ’me e hlokomelisa batho ba phelang tlase ho lona, ho ela hloko boemo boo.

Lineo Moqasa o re o boela a hlokomelisa barafi ba lehlabathe nokeng ea Phuthiatsana hore ba hlokomele thepa ee ba e sebelisang hobane ha pula e ntse e tsoelapele ho na, mothamo oa metsi o phahama, a tla e hohola. Hlephe

 

Mashano a reng Mokhothu o filoe likoloi a tletse hohle

Mathibeli-Mokhothu

Mashano a reng moetellipele oa Potoana o rekiloe ka likoloi tse hlano ke ’Muso oa Lephele, a ntse a tsoelapele ho qhalana le mafatše ka marangrang, ke ho rata litaba tse mpe ha sechaba sa Basotho.

Ho le joalo, ho bonahala Party Political Machinery ea Smartman sa ’Ma-amohelang e sebetsa ka matla a maholo ho tšoerehlisa mashano ao Mapotoana a reng ke litaba tsa batho ba hlotsoeng ke tsamaiso ea mokha oa bona, o seng o tšoarelletsoe ke ho ba haufi le puso feela.

Mashano ana a lipolotiki le bapolotiki, ke e ’ngoe ea lintho tse etsang hore Moafrika le Sechaba sa Molimo Apostolic Church in Zion, li eme ka maoto, nyene le bosiu, li tsekelle hore Molao oa Motheo oa naha ena, o lomosoe ka BoKreste, thuto ea Jesu e tle e tsebe ho rutoa likolong, Basotho ba hole ba rutoa ho nena liketseletso, mashano le bolotsana. RK.

Mathibeli o re ha se ’nete hore o phalletsoe ka likoloi

Mathibeli-Mokhothu

Moetellipele oa Potoana, monghali Mathibeli Mokhothu, o re ha se ’nete hore o phalletsoe ka makoloi a mahlano ke ’muso, ka sepheo sa ho reka tšehetso ea hae bothateng boo o kopaneng le bona, ba borabele ba maparamente a oona a mashome a mabeli.

O ne a araba Lehakoe la Litaba potsong e neng e tsoetsoe ke litaba tse phatlalalitsoeng ka marangrang ke e mong oa banna bao a itseng ke lisoasoi tse leshano.

Ka lehlohonolo, Mapotoana a seng a bone phatlalatso eo, a se a ntse a e pharalatsa ka litsoibila tse bohale a re monna eo, a ke a shebane le tharollo ea bothata bo aparetseng ’muso oa habo, a khaohane le Smartman sa ’Maamohelang, se papaele. RK