Morali le ’m’ae ba khakhatheloa linotlolo tsa ntlo ea mothamahane Berea

Mosali-moholo ea lilemo li 85 le morali oa hae oa tse 50 ba Sekamaneng Literapising Ha-Selala Majara, Berea, ba khakhathiloe ke senokoane se sa tsejoeng ho bo selang Laboraro lena, se ba tsekisa linotlolo tsa ntlo ea mothamahane, ka mabaka a sa tsejoeng.

Mofani oa litaba tsena ee Lehakoe la Litaba le nang le mabitso a hae, o re  morali eo oa nkhono o mo boleletse hore senokoane, se ile sa ’matla linotlolo tsa moo a sebetsang, eare ha se sa li fumane, sa ba khakhatha le ’m’ae ea kulang.

O re ba ile ba letsetsa sepolesa sa Ha Mabote se ileng sa re, se sitoa ho fihla sebakeng sa ketsahalo ka lebaka la bosieo ba koloi, sa mpa sa re bao ba potlakisetsoe sepetlele, ba isoa tliliniking ea Mabote e ileng ea ba fetisetsa sepetlele Queen ’Mamohato.