Moahi oa Thaba-Khubelu Ha-’Makhoai Matete, Mokhotlong, o re ba fumane bohashana ba liphoofolo tsa bona tse ileng hapjoa ke maZulu, a bileng a nkella balisana le lintja tsa bona ka Labotšelela la beke e fetileng, ’me ba li fumane ka Labobeli lena.

Monghali Moitheri Mashalane, o re ba ile ba hlabeloa mokhosi ke e mong oa balisana ba bararo, ea ileng a phonyoha matsohong a maZulu, ba tsoa ka makhalo le mapolesa a mararo, ba fumana likhutšoane tse mashome a robeli a metso e mene le likhomo tse peli, Thaba-Mhlophe, Natala, Afrika Boroa.

O re liphoofolo tseo ba li bone li tsoa mokoting o mong hona sebakeng se boletsoeng, ha hlaha monna ea ileng a leka ho ba thunya, ba sa maketse, baahi ba hona moo ba ba hlasela.