52000019 e re batho ba hapile ba sa becha

Monna ea Phamong Ha Nthati Bereng, Mohalesuku, o re o fumane tsoibila e mo makalitseng, ea nomoro ea 52000019, e reng o hapile chelete e likete tse robong le metso e mehlano ea Maloti, eo ha a e sala morao e ’matlang a lefe chelete e itseng, ka Labotšelela le fetileng.

Monghali Keitumetse Motiki o re o ile a boela a fuoa nomoro ea RSA hore a e letsetse a fumane likateng tsa hore o tla e fumana bokhotho-khotho boo joang, eo a buileng le eena a re a fane ka nomoro ea hae ea poloko,’me taba e ileng ea mo makatsa ka ho fetisisa ke ha a batloa chelete e kaholimo ho sekete sa Maloti hore a tle a fumane eo.

Motiki o re o ile a fumana boeletsi Moafrika Fm hore a ee k’hamphaning ea mehala, e mo boleletseng ho se ele hloko litaba tseo kaha e se tsa ’nete. O re o eletsa sechaba ho ela hloko boqitolo boo.