Ho otlanoa ka majoe lifahleho ka mona ka polotiking.

OPPOSITION-bloc-Leaders-comprising-All-Basotho-Convention-Alliance-for-Democrats-AD-Basotho-National-Party-BNP-and-Reformed-Congress-of-Lesotho-RCL-2-1024x537Lipolotiki tsa Lesotho li se li futhumetse hoo e kang likhetho li tla tsoha li bitsoa hosesane, banna ba bitsana ka mabitso a thata, ha ba bang ba iphafa, ba ipolelisa borutehi, athe ba bang ke ba reng na e ea kae baneng.

Lekhotla la Puso ea Sechaba le se le le libeke joale le saelelitse, le kena metse le metsana le buisana le Basotho, ka molomo oa moetellipele oa lona, Monghali Mathibeli Mokhothu, ea beng a robale mekhorong ea bao a ba etetseng, eena le litho tsa komiti ea habo e kholo.

Kobotata le eona e tsoile letšolo, e tšoara liboka tse kholo tsa moetellipele oa lekhotla leo, le hoja ho e-na le maparamente a mokha oo a seng a ipolelletse hore a tla lebanya thebe le eena, a mo betse fupe, ha a lahlela le ’ona a lahlele, ha ho ea thibang, ha ho ea ikokobeletsang e mong.

Har’a lipuo tse hlahellang libokeng tsena, ke boitlhakiso ba mahlakore ka ho fapakana. Le leng, le ipolelisa borutehi le botsebihali ba molao oa motheo, ha le leng le ipitsa mokokotlo oa lekhotla, ke lona le thehileng lekhotla leo.

Le bile le re le leng ke la senqanqana se theohang le pula, se qothomelang ka har’a kobo e kholo, letata la raulu-ulu, ka roka ka ba ka khathala, le batla ho hapa boetellipele ba eona. Le re leno la senqanqana le tla bo fumana ha soebehla boetellipele boo ka ABC.

Kanana ea Basotho le Nonyana e Kholo le tsona li se li simolllotse ho buisana le sechaba ka liboka, Nonyana e Kholo eona e ntse e bile e hlophisetsa moetellipele oa eona likopano le sechaba sa lebatooa la ’Maletsunyane, moo a tlang ho keteka letsatsi la hae la tsoalo le bana ba likolo.

Monghali Mothejoa Metsing o tla abela bana ba tsoang malapeng a fokolang libuka le lieta tsa sekolo. Sethala sa Moruo le sona ha se itheke moroalo, se ralotsa ka har’a setereke sa Mafeteng se bua le bakhethi.