Sefefo se fefola karolo e ’ngoe ea ntlo ea motšehetsi oa Moafrika, Mafeteng

E mong oa batšehetsi ba Moafrika Fm, Likhoele Ha-’Maseabi Matlosa, Mafeteng o ile a lokela ho kopa boroko ha baahisane, ka mor’a hore ntlo ea hae e fefoloe ke moea o bileng matla ka Labosupa le sa tsoa feta.

’Makatleho Qhelane, ea tsejoang ka la ’Maamohelang, a bua ho Tsa Mafelo a beke, o re ba phelang le eena ba ile ba iphumana ba se ba bona leholimo, marulelo a ile, le ha ho le joalo, ba ile ba amoheleha baahisaneng, ba pata lihlooho.

O re ke bonyane kamore e le ’ngoe e fefohileng, ho tse tharo, ’me e hloka marulelo, hobane a eona a senyehile hampe, le ha ho le joalo ha ho motho ea hlahileng likotsi ketsahalong eo.