Moshanyana o nyamella lelapa la mosamaria, Maseru

Moahi oa Phuthiatsana Ha-Jimisi Makhobalo, Maseru, o re moshanyana ee a ileng a mo amohela lapeng ha hae ka Laboraro la beke ena, o mo fumane a nyametse ka tlung ee a neng a mo file boroko ka ho eona, hoseng ha Labone lena.

Monghali Hotsekoang Maselela, o re o ne a ile a amohela Mpho Nkheli ka mor’a ho utloa tsietsi ea hae qhooeng ena ka makhetlo, ea ho nenoa ke ba habo ’m’ae, eaba o etsa qeto le lelapa la hae ho mo phutha.

O re o ile a isa moshanayana eo ea lilemo li leshome le metso e mehlano ho ramotse hang ha a fihla, ’me o ne a rerile ho mo fetisetsa moreneng oa sebaka, empa a fumana a se a le sieo, leha ho le joalo, o ntse a lebeletsoe.