Bahoebi ba re ba batla ponaletso thekisong ea sets’a sa ‘muso, Botha-Bothe

Bahoebi ba Botha-Bothe ba re ba isoa holimo le tlase ke ba lokeng ho ba fa likarabo holim’a thekiso ea moaho oa Mokorotlo o toropong eo, oo ba sa tsebisoang ka molao hore o’a rekisoa ke lekhotla la toropo ea setereke seo.

Ea buileng lebitsong la bona Monghali Thabo Shao, o re thekiso eo, ha e ea tsebisoa sechaba ka mokhoa oa ho bapatsoa, bonyane libeke tse tšeletseng, ’me see ba se fumaneng, ke hore bang ba bahoebi, ba ile ba tsebisoa litaba tseo ka mohala.

Leha ho le joalo, mongoli oa toropo monghali Thabiso Nchakha o re, moaho o ne o sa qetoa ho hahuoa, eaba karolo ea bahoebi ba toropo eo, e ngolla k’hansele hore e kopa sebaka seo, ka lereng se bokanetsoe ke mek’huk’hu, ha se sa na chebahalo, ’me ba tla itokisetsa sona.