Thak’a Mahlothe o thethile lilemo tse 42 tsa tsoalo ea hae

Mathibeli-MokhothuMoetellipele oa Potoana, monghali Mathibeli Mokhothu, ka Laboraro lena,o keteka lilemo tse mashome a mane a metso e ’meli a e-ja mabele.

Ka mohlolo o makalitseng Lehakoe la Litaba la MOAFRIKA, o hlahile ka khoeli e le ’ngoe le moetellipele ea thehileng Potoana le ho nehelana ka lesokoana la boetellipele ba DC ho eena, e leng Dr Pakalitha Mosisili.

Smartman sa ’M’e ’Maamohelang oa Likhoele, Mafeteng, se jelella tsoalo ena ea sona ka ho loanela litokelo tsa Basotho ka Lekhotleng la Sechaba, moo ho ntseng ho ngangisanoa ka likhakanyo tsa lichelete tsa selemo sena.

Mokhothu o re takatso ea hae ke hore likhakanyo tsena li arabe litlhoko tsa sechaba sohle sa Basotho, har’a tse ngata,sello sa matichere, sa borankulikae, sa temo ea lijalo, tlhokahalo ea mesebetsi, phano ea lits’ebeletso sechabeng ke ’muso le kholiso ea moruo oa naha, bobolu le lipolao bo fele.