Bamameli ba MOAFRIKA ba re Kobotata e lekhatheng la ho petsoha

Bamameli ba MOAFRIKA FM ho tloha mafekefekeng ho tla kena ho Rentšalephola le Lekomong, ho balelloa le ba ngolang maboteng a MOAFRIKA  a marangrang, ba ntsoeleng hore mokha o moholo setlamong sa puso ea Lephele o makhatheng a ho hahoha, ho tlang ho tlama tonakholo ho bitsa likhetho kapa ho kopanela puso le bohanyetsi.

Ba re nyeoe ea likhetho tsa komiti e kholo ea Kobatata, e bakileng karohano ea ba bitsoang Likatana le LiEsaea ke lesika la tholo, ntetekoane khaoha, ha ho letho le tlang ho thibela sehlopha se seng ho oela oela bolibeng ha le khaoha. Ba re ke sesi sa sehalahala sa matlaka, thokolosi e ke ke ea se mamella. Ke tlalimothoana, tsolo la matsoho le nkang ngoana ka mor’a ’ma’e.

Ke ho lemoha tsietsi e ka ’nang ea le hlahela, lehlakore la Likatana le tlalehoa le se le ntse le kokota ntlong ea lelimo, le buisana le bohanyetsi boo maoba le neng le bo qosa ka ho bolaea masole le mapolesa. Lekhetlong lena, le re ho lebaloe tse fetiloeng, ho bopjoe puso e ka khollang Lesotho tlokotsing ee le reng le bona e le ho eona.