Moahi oa Qoaling Ha Matsoso, Maseru, o re matsoho a hae a sitoa ho sebetsa hantle ka mor’a ho faseletsoa ka morao ka mohala, ke mapolesa a Ha Thetsane, ka pelaello ea bosholu ba thepa e kenyeletsang ea motlakase ka Laboraro le fetileng.

Monghali Tšeliso Qhobosheane o re ho ne ho ile ha nyamela thepa e boletsoeng, ea monna ea ahileng matlo a hirisoang haufi le ha hae, ka Labosupa le fetileng, ea ileng a mo fa linotlolo tsa ’ona, a mo kopa ho bulela ba k’hamphani ea motlakase, ho a hlahloba.

Qhobosheane o re ka le hlahlamang, mong’a malaene o ile a mo bolella litaba tsena, ’me o ile a bitsetsoa sepoleseng sa Ha Thetsane, se mo hlokofalitseng.

Eo moahisane, o boleletse Lehakoe la Litaba hore o tseba litaba tsena tseo a reng li ntse li sebetsoa ke khaitseli ea hae,’me o kopile ho se bue se-ea-le-moeeng.